Ihre Browserversion ist veraltet. Wir empfehlen, Ihren Browser auf die neueste Version zu aktualisieren.

 

 Der Komedi 2020

 

  Vers 1

 

 

Nach eim Johr Pause do wet ich euch höt Zobe weder begrüesse


s`letscht Johr han ich chrankheitshalber leider ussetze müesse


defür fehlt hür mis ganze Team alli drü händ leider abgseit


gsänder so funktioniert be eus usglichendi Gerechtigkeit

 

 

   Vers 2

 

 

De Neymar stoht wenn er ned grad liet uf em Fuessballplatz


de Simi Ammann stoht am Schanzetesch und macht denn en chline Satz


d`Martina Hingis stoht jetzt uf de Stross met eme Chenderwage das ahni


und d`Lara Gut die stoht im Winter uf de Schii und em Sommer uf de Behrami

 

 

   Vers 3

 

 

No Rytz no fun heissts be de Grüene wosi d`Wahle händ gwonne gha


und ich träte drumm seit d`Regula Rytz zu de Bundesrotswahle a


und wenn er mech ned wähle tüend droht das sälbstbewusste Wäse


jo de chonnt euch wie am Klimagepfel d`Greta cho d`Levite läse

 

 

   Vers 4

 

 

Er nöchi vom Hallwilersee send 2 Puure so rechtig am tobe


jo do het doch wäg erne Folietunnel d`Pro Natura Isproch erhobe


debie heigesi doch händ die Puure gseit die Tunnel numme welle benütze


damet si eri Aprikosebäum chönd vorem Kaiman schütze

 

 

   Vers 5

 

 

Chürzlech beni er Brugger Altstadt e Shoppingtour go mache


i ha dänkt es heigi ned nor em Neumärt es paar hübschi Sache


doch zum chaufe hets leider nüt rächts gha jo du das esch s`miese


deför chom ich us jedem Lade met ere neue Friese

 

 

   Vers 6

 

 

Bem Spatestech do verzelt is de vo de Swissgrid lang und breit


wiemer jetzt do die Starchstromleitig en Bode ihne verleit


chum het de sie Asproch de fertig gha frogt en euse Gmeindamme denne


du säg emol funktioniert de Treck au met ere Handyantenne


drufabe seit de de flotti Maa jo du aber secher doch


wa meinsch wiso bohrt jetzt de scho gli d`Nagra im Chräntel es Loch

 

 

   Vers 7

 

 

Met em Golfplatz und em Thermalbad vo Schinznach jo was sprecht do degäge


chasch de Stadt Brugg nach de Fusion fascht scho Kurort säge


sie müsste jetzt nor no vom Bruggerbärg bes is Eisi abe welle


met eusne alte Starchstromleitigsmaschte e Seilbahn go anestelle

 

 

   Vers 8

 

 

Jo wer het eigentlich em Riniker Wald umsverecke welle


das mer en Elsbeer- und en Duglasiebaum under Schutz duet stelle


e so en Seich ich sägs euch grad chan ich ned understütze


euse Wiehnachtsbaum met de neue Belüchtig de hät mer selle schütze

 

 

   Vers 9 

 

 

Au wenn ich nor us em Aargau chomm wett ich d`Basler Fasnacht mol lobe


sigs wäg em Cortège de geistriche Schnetzelbänk oder de Gugge am Zischtig Zobe


doch öppis regd`mi das Johr tötlich uf ich chas fasch ned verdaue


gönd die doch eifach jetzt „heb di fescht“ eusere Gugge gos Motto chlaue

 

 

   Vers 10

 

 

Vor 20 Johr do duet z`Rinike en Güggelchrieg Schlagziele mache


jo und s`letscht Johr sorged eusi Freaks das mer öber das Theater chönnd lache


und s`nächscht Johr gäbs schiends no e Fortsetzig ich fend das grandios


jo und säb Stück das heisi de de Chrieg a de Herschestross

 

 

   Vers 11

 

Er kennt sech us met grosse Lastwäge und mit Gäld als Vereinskassier


er esch Kampfrechter be de Liechtathlete und trenkt gärn am Stammtisch es Bier


ond er het sogar no Erfahrig als Pfarrer als Komissar und Polizescht


so jetzt weisch wiso de Siegrischt Ueli euse neui Gmeirot escht

 

 

 

   Vers 12

 

S`goht weder ufwärts met eusre Tannegg s`Aesse top s`Personal 1 A


doch fende es paar es seti no e flotti Serviertochter ha


doch ich fends cool das e dem Lokal nur Männer düend serviere


den chani nämli au den eis go zieh wenn d`Fraue düend demonstriere

 

 

 

  Zugabevers 1

 Ohne Helgen

 

Psst psst psst psst psst psst psst psst psst psst psst psst


psst psst psst psst psst psst psst psst psst psst psst psst


über die alte Bundesröt und Kripto Affaire do hätti au no ein


doch de dörfi leider ned brenge well de esch sträng geheim

 

 

  Zugabevers 2

 Ohne Helgen

 

Jo für mini Ushelfshelgezeigeri wär jetzt zum Schluss en Applaus abracht


well die het das wie ned andersch erwartet würkli super gmacht


und goht drumm jetzt be eusere Riniker Fasnacht sicher ie ed Annale


drumm getz vo mer jetzt do es chlieses Gschänk und er chönd ehre eis zahle

 

 

 

  Helge 11 im Rohbau. Noch nicht ausgemalt