Ihre Browserversion ist veraltet. Wir empfehlen, Ihren Browser auf die neueste Version zu aktualisieren.
 

Willkommen auf der Homepage

 

des Komedi

 

und seinem Team

 

 

 

   Der Komedi 2016

 

  Vers 1
 

Als erschts do tuen ich euch grad emol e tolli Nachrecht kund

euses schöni Dorf hendrem Brugger Bärg jo das esch meh als gsund

ond das lieht ned nome a de Höheloft wo über Riniken lacht

nei letschte Novämber do het doch be eus d`Nagra es EKG gmacht

   
  Vers 2
Ich be de Blatter Seppeli of der ganze Wält bekannt

beh be de Fifa Präsi gsi ond ächli e Fagant

und lüt jetzt grad em Höness a Ueli es wörd mi intressiere

wend du entloh wersch chasch du mer dini Zelle reserviere

   
   Vers 3
Goht die zweuti Gotthardröhre bachab bruched Gwönner en Chopf en chüele

well sie chönd sech denn no lang ned als sechere Sieger füehle

well wenn das setti iträffe das esch s`Primitive

jo den macht secher weder ein e Durchsetzigsinitiative

   
   Vers 4

Em Fricktal und do gets e Frau so hani ghöre lüte

die wälli schiens e ehrem Dorf d`Kuh- ond d`Cheleglogge verbüte

als Dank för sovel Patriotismus das chasch du der dänke

werd ehre Gmei Oberfrick secher es Edelwieshömmli schänke

   
 Vers 5

D`Susan Hochueli esch gar kei sparsami Frau well egal was es duet choschte

d`Möbel för ehri Asylante tuet si em Oschte poschte

ond s`Holz für s`Erschtauguschtfüür chauft si ned wie soscht en Jede

ergendneume ede Schwyz sondern bi der Ikea z`Schwede

   
   Vers 6

Z`Brugg und a de Habsburgstross händ`si e Kamera montiert

jo wiso das het mech wonder gnoh und ich hami drumm informiert

jo die Kamera seit Polizey düeg ned wägem Schlichvercher blenke

sondern nomme wenn en VW dorefahrt wo zum Uspoff us duet stenke

   
   Vers 7

Konfettispalter z`Brugg die tüend zwar hür e neus Kostüm vorstelle

doch d`Nachfolg überneh vom Präsi het bes jetzt no keine welle

wiso dech niemer beerbe wot Hugo das chan ich der scho säge

es händ doch all angst sie müesste de weder 40 Johr s`glichi Kostüm träge

   
   Vers 8

Also als erschts do händ`si det d Wese fascht halbiert

und drofabe au no grad d Ifahrt neu proporzioniert

ond zum Schloss do düend`si denn det nochli Sand streue ond chli teere

ond das alles nor das bem Gmeindshusplatz de neu Hippie-Bus cha chere

   
   Vers 9 

Vor luter Wasserleitigsbrüch ghört`me de Gmeirot säge

legis bem Gmeindsarbeiter nümme denn de Fredhof au no z`pfläge

gottseidank hämmer ned s`Angie Merkel als Amme well die verstoht kei Gspass

die hätti gseit mein lieber Rolf du wir schaffen das

   
   Vers 10

 Jo du wäge Metgledermangel do esch es passiert

und eusi Fraue- und Männerriege händ zäme fussioniert

hätte die of d`Riniker Jäger glost wär das ned nötig gsi ich schwöre

well die händs nähmli gschafft das sech be eus sogar d`Fäldhase weder vermehre

   
   Vers 11

Au eusi Schütze sueched dringend Lüt wo sech lönd en Vorstand wähle

ich wüssti dene en Kandidat de chönnti ehne wärmschtens empfähle

wiener heisst das weisi leider ned doch jetzt fallt`mer grad i

er esch glaub bes vor chorzem no of em Bözbärg Lehrer gsi

   
   Vers 12

Zum Schluss liebi Sponsore wett euses Team weder gärn öppis flüssigs vernechte

doch das Johr würde mer usnahmswies mol of es Glässli Wy verzechte

well sosch schribt den de Roger Köppel weder e sim Wältwochefeuilleton

die ghöre jo wie de neu Bondesrot au zu de Wieswyfraktion

 
Zugabevers 1  
  Ohne Helgen  

Als Zuegab hätt ich gärn no öber de Gauner und die Gfängniswärteri brechtet

doch leider beni z`spot gsi die zweui send vorher scho gflöchtet