Der Komedi 2024

Euse Pensionär de Roger Federer ich tue secher ned übertriebe

werd eus Schwyzer als Tennisjohrhunderttalänt immer in Erinnerig bliebe

nor ei Frog duet mi no beschäftige und loht mer kei Rueh

wie het de soveli Turnier chönne gönne met sine schlächte Schueh

Well eusi AHV am verlumpe esch chöme die z`Bärn uf dummi Ideee

und wänd nach em Fraueräntenalter au no das vo de Männer erhöhe

goht das so witer und mer müend einisch den bes zum Läbesänd de Rugge chrümme

jo den bruchts den be eus er Schwyz die 13. AHV Ränte nümme

Die National- und Ständerotswahle die schiesse mech fang rechtig a

well be de Unterlage im letschte Herbst hets viel z`viel Wahllischte gha

do weisch jo nümm werd wähle sellsch es esch zum Hoore raufe

deför muess ich es Johrlang jetzt kei Schiessipapier me chaufe

Naturschützer und au Politiker die fendes gar ned nett

das de Bundesrot Röschti be eus er Schwyz de Wolf zum Abschuss frey geh het

das sigi e riese Schweinerey wo si ned chönned undestütze

debie het er doch nur i de Bäume Schneider ehri Schwarznaseschoof welle schütze

D`Stadt Brugg die het uf afang Johr e neus Logo übercho

aber wen ich so ghört ha siged dodröber längst ned alli froh

öb das Logo jetzt schön esch oder ned do chame no lang diskutiere

för mech wäri das elei scho ne Grund ned met de Brugger z`fusioniere

Jo sed vielne Johre do händ mer de Ichauf im Volg obe gnosse

doch jetzt esch nach langem hin und här de Lade leider gschlosse

und wenn er wänd wüsse öb er denn am neue Ort weder ufgoht

also ich sägs emol eso ehner werd de Jositsch Bundesrot

Scho s`Dritte mol striete mer jetzt be eus über Tämpo Driessig

söll no eine säge do mer Riniker siege ned fliessig

also wenn das so witer goht jo den gsehn ich tendänz

und mer mache scho bald emol em Zürcher Stadion konkuränz

und wenn en Zürcher die Pointe denäbefendet den muess er ned s`Mässer wetze

sondern eifach das Wort Zürcher met Aarauer ersetze

De Ueli Achermaa Chef vom offnige Waldhus nemmt of ändi letschts Johr de Huet

nach so vellne Johre e sim Amt tuet em die Freyzyt secher guet

drumm gämmer em jetzt do en riese Applaus wonem werd in Erinnerig bliebe

ahh wiso er eigentlich ufghört het er welli jetzt afo Läserbriefe schriebe

Es esch scho toll wie de Hayro luegt das of der Tannegg emmer öppis goht

jo neuerdengs do het er sogar eusi Kerichtsäck im Agebot

und bevor er uf falschi Gedanke chömmed ich sägs do bevor is vergässe

das esch well de Volg obe gschlosse esch ond ned öppe wäg sim Aesse

Ob Musig Sport oder Kultur mehr händ z`Rinike e huffe Vereine

egal was er für Inträssi händ es het secher für jede eine

und den gets do no euse super Verein welle das esch das sägi ned

wer ned letschte Samstig Papiersammlig gsi wüsstisch gar ned das ne no get

Jo euse Schützeverein esch quasi inexistänt lauft nor no uf de Felge

und dorum bruchts vo eus jetzt do secher au kein Helge

Es Loch es Loch es Loch es Loch es Loch e huffe Löcher

es Loch es Loch es Loch es Loch jo Löcher noch und nöcher

es Loch es Loch es Loch es Loch do frogt de Fritz de Franz

du los esch eigentlich z`Rinike no ne Wasserleitig ganz

Ispruch gäge d`Oeffnigszyte vom neue Volg und gäg de Spielplatz vor Rosestross

Ispruch gäge d`Oeberbouig am Waldrand und das de Bus haltet of de Stross

jo wen er gsänd mer händ z`Rinike Isproche e ganze Huffe

drumm hoffe mer das keine Isproch macht wenn mer of euchi Chöste eis wänd suffe

D`Fabyy Schmid Tamby vo de Opus-C-Voll hett um ehre Rücktrett bätte

sie heig jetzt lang gnue de Ton ageh und well weder es 2. Glied trätte

viele Dank für 15 Johr geile Sound met der als Chefin wer hät das dänkt

und drumm händ mer s`Komedi Team der no es chlieses Gschänk