Der Komedi 2015

  Vers 1

30 Johr lang dommi Spröch ond 30 Johr glatti Helge

30 Johr scho gets s`Komedi-Team eus haut nüt os de Felge

ond apropoz 30 Johr s`schlimmscht Zenario wo mer vorschwebt

das de Isprächer vom Stadion z`Aarau au so lang dorehebt

  Vers 2

Wo der Papagei Thiel ond de Pit Bull Schawinski em Fernseh ufträtte send

hani dänkt jetzt gohts de nömme lang und die Zwe nähme sech am Grend

jo wenns Schwyzer Fernseh of dem Niveau e Zuekonft sett witterfahre

den chasches mache wed Susan Hochueli und der d`Billaggebühre spaare

   Vers 3

E Frau schriebt enere Kontaktazeig ganz eifach und banal

ich sueche en Maa meteme Rossschwanz d`Frisur die esch egal

s`erscht Agebot wo ofs Händy chonnt du das esch de Knüller

do schomol es Foti us mim Büro Absänder Geri Müller

   Vers 4

Nur ein Gegner müemer jetzt no schlo ond den lacht för eus d`Sonne

jo ond eusi Region het s`Renne om der Atommüll gwonne

do seit ein vo dene paar Nase z`Brugg wo vor em Ensi düend demonstriere

chomm do semmer nümm erwönscht mer düend en Bözbärg ue disloziere

 Vers 5

Ar Fuessball-Wm z`Brasilie send d`Schiedsrechter neuerdengs met eme Spray presänt

damet be me Freystoss d`Spieler vor Muur emmer gnue Abstand händ

jo sone Spray wämmer jetzt au het d`Chelepfleg z`Umike bestemmt

damet eusi Frau Pfarrer vo de Chele gnue Abstand nemmt

   Vers 6

Ond jetzt do a dere Stell no ne leidigi Gschecht

also wenn ich ehrlich be ehr send doch ned ganz decht

nä nei ich rede do ned vo euch ich well jo schliessli kei Krach

ich rede do vom Waldhusbronne ond vom Friedhofsdach

   Vers 7

Bem Gmeihus ond händs em Novämber e grossi Tanne gfällt

händ`si züglet of de Bronneplatz ond det als Wiehnachtsbaum ufgstellt

ber Yweyg strahlt`si e neuem Glanz s`ganz Dorf duet applaudiere

ossert die vom Underdorf wo nömm chönd telefoniere.

   Vers 8

En Bruch en Bruch en Bruch en Bruch en Bruch ond nomol eine

en Bruch en Bruch en Bruch en Bruch langsam werds läschtig so wörd ich meine

en Bruch en Bruch en Bruch en Bruch en Bruch das nemmt keis Aend

i ha gar ned gwösst das mer z`Rinike sovel Wasserleitige händ

Ond damet mer en Zuekonft au genau weiss wo sone Leitigsbroch äxistiert

het mer jetzt be eus em Dorf neui Strosseschelder montiert

   Vers 9

S`letschti Johr afangs Septämber do esch es passiert

de 1500i Ihwohner het sech z`Rinike iquartiert

of de Gmei unde händ si soumässig de Plausch ab dem Jubiläumsbörger

well es esch es chlieses Chend ond kein Sozialhelfebezöger

   Vers 10

Ond zum Schloss do wet ich mech no vor de Liselotte verneige

well Sie duet hüür scho zum zwänzigschte mol eusi Helge zeige

also au das Jubiläum muess gfiered si das han ich mer gschwore

ich hoffe dromm er heiged scho all eues s`Portmonee devore