Komedi 2013 - Meine Website


Der Komedi 2013
Vers 1
	S`Dani Schär seit zu eus em Komedi-Team vor em Fako müend er ned ed Knüü ond er müend au ned ed Chele go bätte vom Elfi bis am Drüü nei för euche Uftrett höt chönd er e jedem Kostüm cho well mer send do ar Riniker Fasnacht ned bem Concours de la Chanson
Vers 2

	Ich has scho emmer gwösst wäg dem Maya Kaländer werd d`Wält ned ondergoh ich ha me nähmli e dere Sach ganz of s`Cabaret Rotsteft verloh well die händ e eim vo erne Sketsch emmer gseit ganz monter also wäge dem got doch d`Wält ned onder

Vers 3
	De Pabscht het gseit ich werd langsam älter mini Chräft schwende als wie meh ond dromm han ich en wieser Verussecht chürzlech de Rücktrett geh damet ich mech weder frösch fromm und fröhlich füel frey vo allne Sörgeli ned das es mer bis z`letscht no goht wie em Christoph Mörgeli

Vers 4
	Die Militärflüger wo de Murer wot chömmed wien er wössed os Schwede doch beführwortet vo de Politiker de Chauf no lang ned jede jo d`Gegner die beförchte schinds wenn mer die Gripe us Schwede wähle es chönnte wie be dene erne Möbel öpe nöime en Schrube fähle

Vers 5
	Ich wetti do höt zom Vorus scho d`Bouherrschaft dra mahne das si er Geissmatt die neu Schmutzwasserleitig den au gross gnue plane well sosch heits de nähmli e paar Johre du das chönnti schwöre s`gliche wie jetzt bem Gotthardtunnel mehr bruched e zweuti Röhr

Vers 6
	KAIB stoht of dene Plakat wo de Bözbärg duet verziehre doch jetzt welled schiends es paar Lüt det obe die Plache chli aktualisiere jo neuerdengs do stöchi den KNAIB drufobe und das heisi de lut Geri Hirt: Kei neui Adrässe im Bözbärg obe

Vers 7
	Die vo Brugg Regio warte nome no of s`Ok vo de Polizey ond den werd d`Stross of Rüfenach em August för ein Sonntig autofrey jetzt het Ein vom Vcs die glorriech Idee för was no Ackerland go versoue wemmer jetzt die Stross för emmer speert müesst`mer det gar kän Radwäg me boue

Vers 8
	S`letscht Johr do send doch 2 Sprengriter be eus voll ed Schlagziele gspronge well der einti het z`London ar Olympiade nähmli d`Goldmedaille erronge ond der ander de het met sim Ross das esch sagehaft vo Rinike doch tatsächlich de Sprong en Grossrot gschaft ond was de Schlatter Hanspeter nach de Wahl als erschts het wösse welle weni jetzt den ame of Aarau ritte wo chani mis Ross anestelle

Vers 9
	Jo för wer bout`me jetzt die schöne Terrassehüser esch mer dor de Chopf gange woni meti Dezämber e eusem Dorf gseh s`Bougsuech em Chäschtli hange jetzt esch mer de Zwänzger abegheyt weisch wer chonnt ed Chränz das get secher em Hunn Jörg ond em Obrist Ernst sini Altersresidänz

Vers 10
	Eusi Guggemusik d`Opus-C-Voll die fieret hür scho 30 Johr met de Susi Rey ond de Fabienne Schori als Präsidänt und Tambourmajor ond well die Beide be dem Verein de Lade so toll duend schmeisse müessti euses Motto statt „Flower-Power“ doch „Fraue-Power“ heisse

Vers 11
	So nach em letschte Bank hät s`Komedi-Team weder schampar dorscht jo ond was Er eus schpändiered das esch eigentlech worscht ob Bier Wy Schnaps oder au es Cüpli mer trenked so allerhand jo also mer suffed fasch alles nor keis Kaffi am Pischterand

Vers 12
	Jedes Johr decht ich es Dutzend Värs also genau zwölf doch das Johr han ich mech verzellt ich chome nome of Elf jetzt lüt ich glaub Morn of Bärn ue a ond tue en Hörer ine huche chönnted er ned em Ständerot no en Stemmezähler bruche

Zugabevers 1
Ohne Helgen	Stau am Gubrischt Stau en Rothrischt Stau au vor St Galle Stau vor em Belche Stau vor em Gotthard und z`Basel vor de Schwyzerhalle Stau am Morge Stau am Obe Stau scho velli Stunde ond nach der Eröffnig vom Campus z`Brugg dänk äno Stau em Muusloch unde


Zugabevers 2
Ohne Helgen	Do het doch be mer en Dütsche blöfft Komedi hast du schon erfahren wir haben jetzt bei uns in Deutschland Pferdefleisch in den Teigwaren jo das esch no gar nüt hani zuenem gseit nur das du das grad weisch bei uns gibt’s jetzt im Bündnerland schon Lasagne mit Bärenfleisch