Der Komedi 2010

  Vers 1

Chum esch de Obama z`Amerika so rechtig Präsidänt

jo do überchonnt er doch scho de Nobälpris als Presänt

mer s`Komedi Team fende das en Wetz de reinschti Chendergarte

jo eus gets schliessli scho 25 Johr ond mer send emmer no am warte

  Vers 2

Iche bine dafür seit s`Micheline Calmy-Rey wir nehmen 2 Häfling aus Quantanamo

was frogt entsetzt do de Ueli Murer os Quantana wo

ich ben au deför seit de Hans-Ruedi Merz ond nemmt no en Schlock Kaffi

ond seit: gäll die tusche mer den i gäge die 2 Geisle vom Gaddafi 

   Vers 3

Nach em Minarettverbot so hani ghöre lüte

do weted es paar em Bondeshus am liebschte au no s`Chopftuech verbüte

do chamer jetzt teilter Meinig si doch ein Vorteil wörds ha

do gsäch mer jetz ändli öb de Mike Shiva e Frau esch oder e Maa

   Vers 4

Ond denn gets au no Politiker die wete das mer d`Waffe

ond d`Munizion es Züghus brengt ond d`Armee wörd abschaffe

jo ond wer goht den frog ich die ohni sie welle z`beleidige

em Chräntel hende s`Naturschotzgebiet gäge d`Free for Peace go verteidige

 Vers 5

Es schneyelet es beyelet z`Brogg goht e frösche Wend

jo of Pangsion seit de Alder Rolf freu er sich wienes chlieses Chend

ond au wenn er jetzt Zyt heig deför ond s`Volk das vellecht meini

er sigi of Tube spezialisiert Flamingos schüss er e keini

   Vers 6

Dank de Doris Leuthard do esch das Johr de höchschti Bondesrot e Frau

ond met de Pascale Bruderer gelt em Nationalrot s`gliche au

ond d`Erika Forster das esch die wo em Ständerot z`Oberscht stoht

do beni froh das wenigschtens be eus no der Ernst Obrist seit wos doregoht

   Vers 7

Das Johr het eusi Chelegmei e ehrem Palmarès

schiends en Wettbewärb wo heisst „Wer wird Christ des Jahres“

ond wend du be dem Wettbewärb de erschti Pries wetsch verbueche

den muesch eifach nor all ehri Aläss em Veranstaltigskaländer bsueche

   Vers 8

Ghöred er au zo dene Lüt ich sägs do ganz bescheide

wo z`Rinike d`Musig ond Guggemusig ned vonenand cha onderscheide

denn han ich euch do en eifache Typ das ehr die nömm verwächslet

also d`Gugge die brucht ned 25 Johr bes sie ehres Kostüm wächslet

   Vers 9

A de letschte Gmeind du do duet ein d`Aregig deponiere

öb mer ned euse Chreisel vellecht chli besser chönnt markiere

das wärdi no gmacht het de Gmeirot gseit sie warte nor no of de Momänt

wos den ändli Liechter gäb wo ne Diebstahlsecherig händ

   Vers 10

Hende em Schänkebärgertal düend si als probiere

doch Välte ond Vellnachere die wänd eifach ned fusioniere

zom Glöck meint do ein vom Neuquartier hets nor emmer eis Rinike geh

well jetzt womer so blöd tüend wäg de Starchstromleitig wörd eus s`Ennerdorf secher nömm neh

   Vers 11

Zom Schloss hani do no es chlieses Quiz wössed er Fraue ond Manne

wie mer en ganze Saal voll Lüt chan of d`Foltere spanne

also du das esch ganz eifach wenn er jetzt e Zuegab wänd

denn muess ich demet nome warte bes mer Elfi händ

   Vers 12

Näbem Zeddel händ mer eusi Bankdate hür au no of e CD kopiert

jo ond drofabe han ich stenk fräch de Merkel telefoniert

hey Angie was zahlsch för di CD do hesch du der das scho öberleit

ond den het sie am Telefon folgendes zuemer gseit

Benni gottfredstotz en Kiosk….