Der Komedi 2009

  Vers 1

Mer händ en Staatspräsidänt blöfft en Franzos du de het e Frau wo cha senge

jo ond mer seit de Dütsch händ sogar e Frau wo duets Zeppter schwenge

jo ond „yes we can“ seit der Amerikaner jetzt en Schwarze em wisse Gemäuer

da esch no gar nüt hani zo dene gseit euse neu Bondesrot esch wederchäuer 

  Vers 2

Wo eusi Armee Lüt gsuecht het em Kampf gäg d`Pirateflotte

jo do händ die doch os Versehe au no mech ufbotte

denne hanni aber grad d`Meinig gseit wosi me düend prüefe

aso schwemme channi de ned aber e 20 Sproche om Hilfe rüefe

   Vers 3

De Peter Kurer jo de vo de Ubs lütet em Bondesrot a

chönnte mer äch besoguet nomol en Zueschoss ha

well met de erschte 6 Milliarde gots jetzt langsam z`Aend

nachdem mer allne euse Bosse do de Bonus uszahlt händ

   Vers 4

Do rüefed doch es paar Persone us well sie bem Bözbärg wänd Chalch abboue

die händs Gfühl mer wördi debie dert die ganzi Landschaft versoue

jo wäg dere Chesgrueb wo das get müend die doch ned verschrecke

die düens doch nochär sowiso met Atommöll zuedecke

 Vers 5

Do fordere doch zwe Manne vo Brogg im AZ-Regioblatt

emme grosse Inserat „neui Gsechter“ brucht die Stadt

drofabe meint de Alder Rolf was söll die ganzi Action

also do mach ich jo nömme met ich be doch ned de Michael Jackson

   Vers 6

Bis jetzt beni emmer der Meinig gsi das z`Rinike alli Affe

oder andersch gseit so Type wen ich of de Gmei chönnte go schaffe

doch sed em letschte Johr do weis ich jetzt was för strängi Kriterie die wänd

die stelle jo nor no Persone i wo en Olympiamedaille händ

   Vers 7

A de Seifecheschte Schwyzermeisterschaft do druf hätti au nie gwettet

do het is doch Gmeind Umike vor de gröschte Blamage grettet

well eusi ahnschienend vergässe händ d`Fahne z`hänke ad d`Fahnestange

händ die det onde fröndlecherwies eifach ehri chli länger lo hange

   Vers 8

Dank eusne Igangstafele do wo jetzt stönd am Strosserand

esch Rinike jetzt händ er das gwösst of de ganze Wält bekannt

sogar en Asiat het die Tafele gseh ond de Sproch gläse wo stoht derte

ond het gseit mini liebe Lüt do he chomm ich cho werte

   Vers 9

Ond en Sache Starchstromleitig do hani no de neuschti Brecht

eusi Isproch die goht zrog vom Bondes- as Verwaltigsgrecht

jo ergendwie do chonnts mer vor sig wie em alte Rom

also wenn das so witer goht semmer no länger onder Strom

   Vers 10

Im Novämber Schnee ond Dezämber Schnee bes i die tüfschte Lage

im Januar de nomee Schnee ond nomee chalti Tage

em Februar de emmer no Schnee und d`Bise hende dri

so das wär no min Schnetzelbank öber d`Klimaerwärmig gsi

   Vers 11

Eusi Cracks send a de Ski-Wm dank de Lara weder rechtig guet

ond sie fahred was Cuche was hesch wienis de Carlo Janka zeige tuet

d`Schiesprenger flüge ond de Cologna sprentet of sine Langlaufschi

also du vo mer us chönnts hür s`ganz Johr Wenter si

   Vers 12

Also mer 4 vo Komedi-Team nei mer wänd kei Worscht

aber nach em letschte Schnetzelbank hätte mer weder schampar dorscht

drom wäre mer froh wenn e huffe Lüt jetzt e Rondi wörded ufrüehre

damet mer zäme en Obe lang chönnd en Botellon dorefüehre

Zugabevers 1  

  Ohne Helgen

 I ha no halber dänkt das er au Hür of e Zuegab warted wie versässe

doch zo miner Schand muess ich gestoh die hani vergässe

jetzt ghöri euch scho jommere ond gsenech met em Fenger of mech ziele

de ghört jo wie paar vo de Opus-C-Voll au scho zo de Senile