Der Komedi 2026

  Vers 1

Ich bi jo jetz sed churzem em Unruhestand und drumm würds eus wunder neh

öb er wieterhin mini Värs wänd ghöre und eusi Helge wänd gseh

oder andersch gseit wer euse Uftrett au en Zuekunf will erläbe

de söll das doch bitte jetz bezüge met Hand erhäbe

   Vers 2

Zersch schiesst er Karin Käller Suter zäme schreyt in Hörer 39 Prozänt

drufabe goht de Trump uf Venezuela und störzt det de Präsidänt

und jetzt wotter de Däne no Grönland chlaue das fräche Mannezemmer

jo und so ein chonnt zu eus as WEF bi dem goht schlemmer wörkli emmer

   Vers 3

Mer tüend sinerzyt de 2. Oktober 2001 schriebe

do esch d`Swissair groundet ehri Flugi händ müesse am Bode bliebe

und jetz nach 25 Johr wo für Olympia werd selektioniert

jo do esch doch tatsächlich em Simi Ammann s`glich passiert

   Vers 4

Du glaubsch es ned eusi SBB ich muss das do erwähne

chauft die neue Züg well si belliger send em Schwobeländli äne

ich hoffe jo nor das ufem Lieferschie den de Pries gross und fettdruckt stoht

ned das es euch denne wie eusre Armee mit de neue Kampfjets goht

   Vers 5

Ich wett euch do amene ganz eifache Bispiel erkläre was wörd passiere

wenn be de Halbierigsinitative d`Beführworter chönnted jubiliere

   Vers 6

Statt eme richtige grosse Füür cha mer de Gmeirot das begründe

düend mer z`Rinike am 1. August nor no Finnecherze azünde

und chonnt jetzt dene no s`Füürwärksverbot wägem Lärm und em Rauch i de Luft

warted ehr nor den lömmer de halt Tischbombe ed Luft

Vers 7

Einsam und verlasse esch er gstande be eus am Waldrand unde

doch jetzt esch au der letschti Maschte vo der alte Leitig verschwunde

debie ben ich der Meinig gsi mer Riniker sige de Spänder

jetzt wo d`Susanne Wille zruggkräbst esch für de neui UKW Sänder

   Vers 8

Dank eme Sponsor hämmer im Riniker Wald euses Seilbähnli chönne flicke

und dank de Ortsbürger chasch bem Waldhus obe en neue Brunne erblicke

und dank de neue Wägwieser finsch en Wald ie und au weder zrugg

jetzt esch euse Forscht de bald me beläbt als d`Altstadt unde in Brugg

   Vers 9 

Mer send 3 Prozänt mit de Stüre ue und müend spöter velecht de no me

bis uf 126 Prozänt jo wemm vo eus duet das ned weh

drumm gets nur eis fusioniere met Brugg well es freut denn secher die Meischte

wenn mer eus wie Villnachere au e neui Badi und en Zeltplatz chönd leischte

  Vers 10

Wäg de viele Ample hani s`letschte Johr d`Boustell am Bözbärg kritisiert

jetz hets det nor no 1 oder 2 min Röffel het also funktioniert

doch mer Riniker müend öppe gar ned meine das mer schneller as Ziel düend glange

well uf eusere Boustell do hets jo ersch e huffe Strech und es paar Stange

   Vers 11

25 Johr Gmeindsarbeiter euse Schär Rolf cha jubiliere

jo do gets für eus nor eis em härzlech z`gratuliere

und em Gmeihus unde do semmer scho froh ohni z`übertriebe

wenn eusi neui Gmeischrieberi nume scho halb solang wördi bliebe

   Vers 12

Somet wär für de hötigi Obe euse Uftrett wieder gloffe

und mir tüend wie alli Johr natürlich wieder druf hoffe

das eus öper en Wyse zahlt jo das wäri mega flott

well mer händ jo ned wie bem Neumärt z`Brugg es Alkohol Verbot

  Vers 13

Und zum Schluss gets vo eus no en riese Dank das er am Afang Alli JO gstumme händ

well das esch secher ned sälbstverständlich und mer näme das als Komplimänt

öbrigens bemene NEI hätte mer vor em Uftrett ich sägs do ganz unginiert

so wie eusi Frau Ex-Gmeindamme de Bättel grad ahnegrüehrt

  Zugabevers 

 Ohne Helgen

A der Olympiade z`Italie er send secher alli em Beld

do hamstered eusi Schwyzer Athlete Medallie wie weld

jo ganzi 23 Stück das wärde mer nie meh vergässe

ich vermuete die händ vor em Wettkampf zum Zmorge alli Aromatchips gässe