Der Komedi 2025

Sed em 6. Novämber s`letschti Johr tuet mech nur 1 Frog quäle

wie chammer nor so en Schwerverbrächer als Präsident nomol wähle

jo die Amis send doch ned ganz butzt ehre IQ esch zum vergässe

ich glaube fasch die händ vor de Wahl zviel Dubai Schoggi gässe

Jo eusi Chrankekasse stiegt scho weder das es nor so kracht

und wen sie jetz au no d`Franchise erhöhe also den guet Nacht

drumm düend jetzt liefere statt lavere liebi Regierigsgenosse

well es händ ned alli sone grosse Loh wie de Axpo ehri Bosse

Nei nei nei alli säged nei de Metti wods ned glenge

als Nachfolg vo de Viola Amherd en gschiede Kandidat z`brenge

wiso sech niemer um de Job riesst nor so under eus Zivileschte

jo wer goht dene scho freiwellig im`VBS go usemeschte

Kenned er scho de Undersched zwösche eusne Autobahne

und de Schwyzer Schiefahrer a de WM z`Oestrich ahne

wärend eusi Schiecracks so schnäll send wie nie egal öb Maa oder Frau

stönd mer wäg dem Autobahnusbou nei immer no stundelang im Stau

Wend du met dim Auto vo Rinike e Reis wotsch es Fricktal plane

de muesch wäg de viele Ample am Bözberg e hufe Zyt iplane

drumm säg ich der überlegder das guet well du muesch beachte

das du weder em Bäre no i de 4 Linde chönntisch übernachte

jo und wenn den logisch überleisch wäris warschiends gschieder

du fahrsch mit dim Auto bis is Birrfäld und nemsch vo det bis uf Schupfart de Flüger

Jo also liebi SRG ich begriff das nie

wiso das er be eusem UKW Sänder händ müesse de Stecker zieh

doch mer händ em Dorf scho bald s`gliche Problem und das goht mer uf e Wecker

wenn s`nämli kein neue Vorstand get zieht au Rinike Live de Stecker

Bis jetzt het sich Brugg immer gweigeret met de Windischer z`fusioniere

doch jetzt werd sich das secher ändere das chani euch garantiere

well gots nämli nach de neuschte Grücht du das wäri glatt

hätte den d`Brugger ändli au en MC Donalds e de Stadt

Wenn sech öper als Gmeirot zur verfüegig stellt den muess me das estimiere

und drumm wet ich der Michael Mosimaa zu diner Wahl no gratuliere

weisch du öbrigens scho wele wichtigi Job du als Neuling dörfsch übernäh

vor eusem Gmeihus hets doch en neue Baum dem muesch jede Morge Wasser gäh

D`Sanija Ameti die chas ned verstoh das me se aprangeret het

nome will sie mit de Pistole dert uf das Mariabild gschosse het

jo wen euch das stört den suech ich mer halt e neus Ziel woni druf cha pfunde

und sithär esch be eus em Neuquartier eusi Ortstafele verschwunde

Ich ha euse Gmeischrieber gfrogt Martin chasch du mer begrönde

wiso be eus uf de Gmei er letschte Zyt e sovel Lüt düend chönde

euse Stürfuss sig z`höch ehre Lohn drumm z`niedrig und drumm hols de Gugger

haue die ame alli ab und gönd als Tschugger zu de Brugger

ytraPuGiR rhoJ-01

-knadiestohS 5202 zräM 61-31

das er das jetzt ned verstande händ dodruf do wördi wette

den gots euch wie mer bem Gäle Blatt mit em Text vo de Fasnachtsplakette

Wenn eusi Tannegg em Sommer e Monet zue esch das weis en jede Globi

jo den gots eus Gäscht ame öpe glich wie dene e de Wüeschti Gobi

doch set dem Johr do müemer nümm euse Durscht usbade

well mer händ jetzt jo be de alte Poscht en neue Getränkelade

doch hüt het de Hayro jo shottseidank of drumm dörf ohni z`schiniere

jede vo euch wo Luscht het eusem Komedi Team eis spändiere